2019區議會選舉與後社運年代
撰文：彰壹棯
日期：2022年12月23日
2019區議會選舉大勝，令黃營士氣大增。但有一點要留意，雖然取得超過八成半議席，但實際得票只有大概六四比（正確講係未夠六成，57.4%），泛黃嘅人從來無大家想像中咁多。要記住，2019已經係社會運動同街頭運動最高峰嘅時候，實際該時較多中立/搖擺票去左泛黃光譜候選人身上。
而2019區議會選舉大勝，因超高投票率（71.23%，以前只有不足六成）及單議席單票制之缺陷令建制出現配票失敗出現嘅結果，實際係社會上並唔係一片黃海，民主派大致只比建制派多出44萬張選票，依家多左人移民外流下，香港內仲堅持努力中嘅同路人只會更辛苦。
覺得係香港人善忘所以多左人幫襯藍店？事實並非如此，愚見有四 :
一. 大部分人非政治狂熱者，未必會立場行先，大部分時間以方便/價錢/相同價錢下品質較佳優先
二. 黃圈紛爭被媒體不斷放大，失去其支持者
三. 黃店以立場先行，並未做到與其價錢相應之質素
四. 喺區選結果已經見到，至少有四成半人比較親建制
咁點解身邊嘅朋友同社交媒體絕大部份人都係黃?
事實上，大家社交媒體或朋友圈裡面大部分都係同立場嘅人，所以好自然會誤以為社會上都係一片黃海，但並唔係咁嘅一回事。令大家有係絕對大多數嘅錯覺係社交媒體演算法帶來嘅同溫層效應，現況絕對不容樂觀。
咁你有咩高見？
後社運年代，就算做緊嘅嘢唔同，唔好一嚟就互相講對方不事。依然努力緊嘅各位更應互相嘗試理解大家嘅困難同處境，互相體諒。希望大家可以行多步，無論任何事都好，保持虛心。先要做好質素，中間市場非常重要，唔需要再塘水滾塘魚。進一步甚至做到賺藍養黃（現實上依家喺資本嚟講「黃圈」絕對係下風，個人認為唔需要跪著賺係必要）先係權宜之計。
謝謝
參考資料：
71.23%：shorturl.at/aCP89
單議席單票制： https://www.wenweipo.com/a/202104/26/AP6085d170e4b0476859b86713.html
大部分人非政治狂熱者，未必會立場行先，大部分時間以方便/價錢/相同價錢下品質較佳優先：shorturl.at/dnpqZ
黃圈紛爭被媒體不斷放大，失去其支持者：https://www.rfa.org/cantonese/news/htm/hk-song-04062022085618.html
黃店以立場先行，並未做到與其價錢相應之質素：https://lihkg.com/thread/2290415/page/1
同溫層效應：shorturl.at/amzLT
